MAADHIMISHO YA SIKU YA WANAWAKE DUNIANI TAREHE 8 MACHI, 2015

Tarehe 8 Machi ya kila mwaka, Tanzania huungana na nchi nyingine wanachama wa Umoja wa Mataifa kuadhimisha kilele cha Siku ya Wanawake Duniani. Tarehe 8 Machi, 2015 tutaadhimisha tena siku hii muhimu katika ngazi ya kitaifa ambapo mkoa wa Morogoro utakuwa mwenyeji wa Maadhimisho haya.Mikoa mingine itakuwa na fursa ya kuandaa maadhimisho haya katika maeneo yao kwa kuzingatia mazingira yao.

Maadhimisho haya hutoa fursa maalum kwa Taifa, mikoa, wilaya na wadau wengine kupima mafanikio yaliyofikiwa katika kumwendeleza mwanamke na kubainisha changamoto zilizopo katika mwitikio wa kuwawezesha wanawake na kuweka mikakati ya kukabiliana na changamoto hizo.

Madhimisho ya Siku ya Wanawake kwa mwaka huu yatahusisha maonesho ya shughuli zinazofanywa na wanawake wenyewe na taasisi za maendeleo ya wanawake na usawa wa kijinsia yatakayoanza tarehe 3 - 8 Machi,2015. Aidha, kutakuwa na kongamano la masuala ya maendeleo ya kiuchumi ya wanawake na usawa wa kijinsia litakalofanyika tarehe 6 Machi, 2015 mkoani Morogoro kama moja ya tukio mahususi na kuhudhuriwa na wanaume na wanawake.

Kaulimbiu ya Maadhimisho ya Siku ya Wanawake Duniani mwaka 2015 inasema: ‘UWEZESHAJI WANAWAKE; TEKELEZA WAKATI NI SASA’. Kaulimbiu hii inalenga kuhamasisha jamii kutambua mchango wa wanawake katika kuleta maendeleo yao; na kuelimisha wadau mbalimbali kuangalia upya wajibu wao wa kuwashirikisha wanawake na kuwapa haki sawa katika nafasi za elimu, uchumi na kijamii ili waweze kuwa chchu katika kuleta maendeleo yao na taifa kwa ujumla.

Natoa wito wa dhati kabisa kwa wanachi na taasisi katika mikoa yote kushiriki kikamilifu katika kuienzi siku hii. Ni matumaini yangu kwamba kupitia maadhimisho haya wadau wote na serikali watakumbushwa wajibu na mchango wao katika kutekeleza kaulimbiu na hatimaye kubaini mbinu za kukabiliana na changamoto za ushiriki na ushirikishaji wa wanawake na wasichana katika maendeleo.

Aidha, nawaomba wanahabari kushirikiana na wadau na Serikali kutangaza na kuelimisha jamii kuhusu shuhuda bora zinazoonyesha jinsi wanawake na wasichana walivyoweza kutumia fursa kikamilifu na kujiletea mafanikio makubwa au kuweza kutoa mchango katika famila, jamii na taifa kwa ujumla. Ifahamike kuwa wanawake ni zaidi ya asilimia 50 (hamsini) ya watanzania wote.Wakishirikishwa ipasavyo katika shughuli za maendeleo na uchumi mchango wao utakuwa chachu kubwa katika maendeleo ya taifa.

Nawatakia maadhimisho mema.

Katibu Mkuu

Wizara ya mendeleo ya Jamii Jinsia na Watoto