NIDA YALIA UKATA,UCHACHE WA WAFANYAKAZI

Mkurugenzi Mkuu wa Mamlaka ya Vitambulisho vya Taifa (Nida), Dickson Maimu. Picha na Maktaba 

                                           
 Na Elizabeth Edward, Mwananchi

Dar es Salaam. Mkurugenzi Mkuu wa Mamlaka ya Vitambulisho vya Taifa (Nida), Dickson Maimu amesema kuchelewa kwa uandikishwaji na utoaji wa vitambulisho hivyo katika mikoa mingi hapa nchini kumesababishwa na uhaba wa fedha na rasilimali watu.

Akizungumza wakati wa Mkutano wa Baraza la Wafanyakazi wa Nida, alisema kuwa licha ya mamlaka hiyo kuendelea na shughuli zake, lakini inakabiliwa na changamoto ya rasilimali fedha na rasilimali watu hali inayozoretesha utendaji na mikakati ya kuendelea na usajili katika mikoa ya Tanzania.

“Mpaka sasa Nida imepiga hatua kubwa katika Usajili na Utambuzi wa watu na ugawaji wa Vitambulisho vya Tafa, lakini bado tunakabiliwa na changamoto ya rasilimali fedha na watu hali inayochangia kuzorotesha utendaji,” alisema Maimu.

Kwa upande wake Naibu Waziri wa Mambo ya Ndani ya Nchi Pereira Ame Silima, ameitaka Nida kuhakikisha changamoto zinazojitokeza kutafutiwa ufumbuzi ili Watanzania wote wenye sifa waweze kupata haki ya msingi ya kikatiba ya kusajiliwa na kupata vitambulisho.

Silima alisema kuwa Serikali itaendelea kusaidia mamlaka hiyo ili kufikia malengo ya Serikali ya awamu ya nne ya kila Mtanzania kusajiliwa na kupata kitambulisho.

“Serikali kupitia Wizara yangu tutaendelea kuongezea nguvu na mamlaka kufikia malengo iliyojiwekea. Lengo ni kuhakikisha tunafanikiwa na Watanzania wote wanapata vitambulisho,”alisema Silima.

Silima alisema Nida ina wajibu na dhamana katika usalama wa nchi kama zilivyo taasisi nyingine, hivyo hawana budi kuhakikisha mradi huo unatekelezeka na wananchi ambao idadi kubwa ni masikini wananufaika ipasavyo.

SOURCE,MWANANCHI

****TUMA PICHA NA VIDEO WhatsApp 0713 059 073 NA 0717 367 693***